Zêdetirî 50 hezar şervanên me hene

ŞEMAL HESEN / SILÊMANÎ/ROJNEWS

Fermandarê Giştî yê Yekîneyên Parastina Gel (YPG) Sîpan Hemo got, dema DAIŞ bi dawî bû, wê ji bo parastina herêmê, sîstemeke nû were avakirin lê ew sîstem ne wekî sîstema artêşê be û got: “Bila her kes bizane, hêzeke me ya têra xwe dike heye ku parastina Rojava û Bakûrê Sûriyeyê herêmên hatine azadkirin biparêzin û li dijî terorê têbikoşin. Hejmara şervanên me zêdetirî 50 hezarî ye.”

Hê hinek din kar jê re pêwîst e

Fermandarê Giştî yê YPG’ê Sîpan Hemo îşaret bi gotegotên wekî “DAIŞ nema, tinebû” kir û derbarê vê yekê de got, “DAIŞ weke sîstem bi dawî bû, lê li hemû herêman weke hucre û rêxistinên din ên DAIŞ‘ê mane. Xebatên me yên ji bo parastina ewlehiyê û kontrolkirina herêmên di bin destê DAIŞ‘ê de wê dewam bike. Em ne di wê baweriyê de ne ku terorîzm bi dawî hatibe. Hê hinek din kar jêre divê. Dema DAIŞ bi dawî bû, wê ji bo parastina herêmê, sîstemeke nû were avakirin, da ku parastina awayê ewlehiya herêman û li hemberî dewambûna gefên terorîzmê û sînoran derbas nekin, YPG wê li hember raweste û erka xwe pêk bîne.”

‘Hejmara şervanên me ji 50 hezar kesî derbas kiriye‘

Hemo bersiva pirsên wekî “Li Bakurê Sûriyeyê artêşeke nû bê avakirin” da û got, “Di medya navxweyî û derve de behsa avakirina artêşekî tê kirin, lê di rastiyê de tiştekî wiha li Rojavayê Kurdistanê û Bakurê Sûriyeyê nîne. Lê sîstema parastinê ya girêdayî hêzan wê wera ava kirin. Eger çi YPG be yan jî QSD be, hemû hêzên parastinê ne. Bila her kes bizane, hêzeke me ya têra xwe dike heye ku parastina Rojava û Bakûrê Sûriyeyê herêmên hatine azadkirin biparêze û li dijî terorê têbikoşe. Hejmara şervanên me zêdetirî 50 hezarî ye.”

‘Ji aliyê kê ve dibe bila bibe bê bersiv namîne‘

Hemo, hewldanên dewleta Tirk ên dagirkeriyê û gefên wê yên li dijî Efrînê jî bi bîr xistin û wiha pê de çû; “Ev ne tiştekî nû ye, nêzî 6 salan e ku dewleta Tirk bi hemû hêza xwe û awayî êrîşê Rojava dike û ev hê dewam dike. Heta niha li Rojavayê Kurdistanê qet ti metirsî û êriş li ser xaka Tirkiyeyê çênebûye. Lê, Tirkiyeyê weke stratejiyekê ji bo xwe daniye. Dema bihurî timî agahiyên êrîşkirina li ser Efrînê di hate belavkirin. Em dubare dikin, her êriş û destdirêjiya li ser Rojavayê Kurdistanê çawa û ji aliyê kê ve dibe bila bibe, wê YPG bersiva guncaw bide û wê mafê xwe yê leşkerî bi kar bîne, bi armanca parastinê.”

‘Peywendiyên me li gel Rûsya û Emerîkayê hene’

Hemo îşaret bi rol û hebûna Emarîka û Rûsya ya li Sûriye û Rojava kir û derbarê vê yekê de wiha peyivî: “Emerîka û Rûsya weke du cemseran derdikevin pêş. Şaş e ku Rûsya weke sosyalîst û sovyeta  berê were dîtin. Armanca herduyan a împeratoriyê heye, dixwazin di cîhanê de, bi hêza leşkerî û aborî împeratoriyekê ava bikin û gelan kontrol bikin. Rûsya û Emerîka gelek lihevkirinên alîkariyê yên li gel hev hene. Heta li Sûriyeyê jî tiştekî bêyî hev nakin. Her tiştî bi hev re li navendeke hevbeş bi hev re bi rê ve dibin. Lê, di warê siyasî de nakokiyên wan hene û encaman jî digirin.”

‘Em li ser esasê berjewendiyên 

gelê xwe peywendiyê saz dikin’

Fermandarê Giştî yê YPG’ê Sîpan Hemo li ser peywendiyên YPG’ê yên li gel Emerîka û Rûsyayê jî ev agahî dan; “Hevkarî û peywendiyên me yên li gel Rûsya û Emerîkayê hene. Li gel her du aliyan, em li ser bingehê parastina berjewendiyên gelê xwe nêzîk dibin. Em li ser bingehê berjewendiyên dewletan ku dixwazin li gorî xwe tevbigerin, peywendiyan çênakin. Me daxwaz û xwestekên xwe anîne ziman. Li gorî van xwestek û daxwazan, em peywendiyan çêdikin, bi eşkereyî peywendiyên me li gel Rûsya  û Emerîka hene. Di qonaxa bê de, wê peywendiyên me yên li gel dewletên din ên bi hêz jî çêbin. Em eşkere dikin, em neçûne li gel ti aliyan û me negotiye em dixwazin peywendiyan çêkin.”