Ma do ziqaqan de xover bidî

Çend hewteyî verê Qerarnameyê Hukmê Qanûnî de (KHK) yê hûmara 696î ame vetiş û bi nê KHKyî do zîndanan de cilê tek tîpî bêrî ferzkerdiş. Vera nê KHKyî de her ke şono hêrs û reaksîyonî zêde benî. 

Babete ser o keyeyê hepsîyan qisey kerdî û vera nê KHKyî de reaksîyon nîşan dayî. Cinîya hepsî Alî Şeno ke 25 serrî yo zîndan de yo, Dondu Şene va ‘ganî ma vera nînan de bivinderî’ û wina dewam kerde: “Ma xoverdayîşê zîndanan silam kenî û xoverdayîşê înan xoverdayîşê ma yo zî. Desteko ke ma teber de bidî zaf muhîm o. Ma zîndanan de qetlîyamanê 1996, Qetlîyamê 19ê Kanûne û sewbîna cuyayî. Ma ê wextan de zî hetê hepsîyan de bî. Beno ke ma reyna bêrî kiştiş, bêrî tewqîfbîyayîş, labelê ganî ma têkoşînê xo bidomnî. Heta ke ma dest ra bêro, ma do xover bidî.”

Bi hawayo kêfî qanûn vejenî

Birayê Hakan Adiguzel ke 19 serrî yo zîndan de yo Nazim Adiguzelî zî va ‘birayê mi mîyanê 19 serran de hema vaje sewqê heme cayê Tirkîya bîyo’ û wina domna: “Dewlete bi nê polîtîkayan tena hepsîyan ceza nêkena, eynî wextî ceza dana keyeyê hepsîyan zî. Birayê mi demanê peyênan de dîyar keno ke zîndanan de zextî zêde bîyî. Wazenî bi sewqan hepsîyan tena veradî. Pêvînayîşo peyên de seba ke birayê mi saeta destê xo de nêvete, ma nêşêna pêvînayîş bikerî. No verê cû çinêbî. Wezîfedarî goreyê xo qanûnan vejenî. Nika zî cilê tek tîpî ferz kenî. Sîstem wazenî tena zîndanan de nê, teber de zî merdimo tek tîp awan bikero. Ma zî sey hepsîyan vera nê kerdişî de xover bidî.”

Dest ronîyeno kitab û mektûbanê ma ser de

Heto bîn ra Muxabîra Ajansê DÎHA ke bi KHKyî amebî padayîş Şerîfe Oruçe zî Zîndanê Mêrdînî ra mektûbêk erşawite û qala neheqîyan kerde. Oruçe mektûba xo de dîyar kerdo ke seba ke dest ronîyeno mektûbanê înan ser de ê nêşênî çîyê ke ewja de benî biresnî teber û wina domnayo: “Wezîfedarê zîndanî dest ronenî kitabê ke ser o morê ‘ame dîyayîş’ nusenî ser de zî. Ser banê koguşan de kamerayî ameyî bicakerdiş. Sey heme zîndanan tîya de zî zext û îşkenceyî zêde benî. Roja Îne 7 embazê camêrdî û 3 cinîyî ameyî surgunkerdiş. Rengê cilan yê sîya, qehwe, keske û lacîwerd ameyî qedexekerdiş” 

NAVENDÊ XEBERAN