Vera kincanê dapîra 75 serrî bêtehamulîya Almanya

Dewleta Alman rîwalê kincê ci yê keske, sûre û zerde derheqê dapîra 75 serrî ya binameyê Serî Gormez de dawa akerd û 300 Euro cezayê pere cirê birna. 

Gormez ke mîyanê Kurdan de zey Xaltika Sorê yena silasnayen, no 23 serrî yo sûka Almanya Bremen de ciwîyena û bi kincanê xo yê renginî tewrê nûmayîşan bena. Nê nûmayîşan ra yew zî 12'ê Mijdara 2016’î de sûka Almanya Koln de virazîya, ke  rejîma Erdogan ame protestokerdiş. Xaltika Sorê na çalakî de bî hedefê polîsanê Alman. Mahkemeya herêmî yê Kolnê, rîwalê kincanê aye 300 Euro cezayê pere Xaltîka Sorê rê birna.

‘Mi vernîya provakasyonî girot’

Serî Gormez ke derheqê babed de qisey kerd da zonayen ke a do îtirazê no qerarî bikero. Gormez aşkere kerd ke, cayo ke rîwalê mexdûrîyeta aye efû biwazê, ceza ci rê ameyo birnayen. 

Xaltika Sorê bi nê vatenan behsê roja nûmayîşî ke bîya sebebê ceza kerd: “Ez bi kincanê xo tewrê mitînga protestokerdişê dîktatorîya Erdogan bîya. Polîsê Kolnî amey mi het û vatî kincê mi Almanya de qedexe yê. Rixmê israra polîsan mi xo ra nêvetî. Dima ra polîsan bi zorî çinayê mi dirnay û mi ra vetî. No hêrîşê polîsan ra dima, însanî çormeyê mi de are bî. Polîsanê Alman waştî provakasyon bikerê, la mi vernîya provakasyonî girot.”

‘Ez a her tim xo ra bida’ 

Gormez vist vîrî ke heqê polîsanê Alman çin o ke vernîya wayîrvejyayîşê erjayeyanê neteweyî yê însanan bigîro û bi nê vatenan hêrsê xo ard ziwan: “Heqê kesî çin o ke, kincê min ê ke mi sembolê neteweyî yê Kurdan ser o neqişkerdo bidirnê û mi ra vejerê. Ez însanêka wayîrê erja ya. Ez do neyra tepya zî sembolê têkoşîna neteweyî yê Kurdistan her cayê kincanê xo ra bipana.    

BREMEN