Reyna yew game xapitişî

XOSER ÇEWLÎG

Verîya çend rojan xebereke weşanîya. Goreyê na xebere ganî aşma gulane de yew partîya newe ronîyabîya. Na xebere verîkîn ajansa rudawî de eşkera bi. Xebere de ame anons kerden ke zazayê tirkîya bi nameya ZHP (Partîya Şarê Zazayan) newe yew partî ronenê. Labelê aşme gulane vîyera û yew qalekî semedo na partî tewa nêvicîya.

Ez bi xo wexto ke na partîya eşnawite qet bawerîya mi pê nêame. Çûnke ma zanane ke zaf deme ke dewleta tirkîya kurdatîyê zazayan înkar kena û asîmîlasyonê gird kurdan ser o xebetnena. Bi taybetî zî zazayan ser de xeylek kayan ferz kena. Ge ge vano ke zazayî eslê xo de tirkî, ge ge vano ke zazayî bi xo yew şar o. Zaf deme de paşte dayê zazayan û rey rey zî polîtîkayê xo yê zazayan bedilna û rey rey zî zazayan kurd xesibna. 

Winî aseno ke na partîye zî sey yew proje û polîtîkayê dewlete yo. Eşkera û îzahkerdîşê na partîye de xeylek zî nakokî estê. Înan îzahetê xo de vat ke “Des û hewt bajarê Tirkîya de zazayî estî. Meclîsê tirkîya de zî 63 parlementerê zaza estê. Nê parlementerî zî zafîyer mîyanê partîya AKP de yî. Ma qayilê ke  reyê ma yê ke şinê AKP wa bîrê partîya ma.” Tîya de yew nakokîya pîl esta. Heme kurdî zanê ke bê xebera AKP yan zî bê xebera dewlete na partîye nêbena a. Goreyê texmînanê mi na partîye hetê zazayanî akp’yijan abena. 

Heto bîn ra zî îzahatî de vajîya ke ameyoxê zazayan û ameyoxê tirkîya ser prensîbanê rejîme ataturkî û cumhurîyetî de yo. Çew (kes) şaş maneno. Ez bawer kena ke nêzdîye yan çend roje yan zî çend hewte ra pey boyê na mesela vejîyeno.

Dewleta tirkîya her deme de yewîye kurdan ser de  herimnayiş kerda. Reyna zî zîhnîyetê dewleta tirkîya sey her wextî qayil bi ke şarê kurdî xo mîyan de parê bikero. Na gameye partîye zî na zîhnîyetî ra xizmet keno. Ganî şarê ma ye kurdan wa nîro nê kayanê qilêrîn. Ma tarîxe kurdan de pîyayê. Zîhnîyeta înan nêeşkeno ma cîya bikero. Ne ronayîşê partîye ZHP ne zî înkarkerdîşê kurdatîyê zazayan pere nêkeno. Ez bawer kena ke paxe şarê ma zî nêkeno û game înan pûç vecîyeno.